نزلـِة عشق
يحي قدري
من فضلك
وانتي بتتمشي
في كورنيش القلب
اشتري حاجه ساقعه
م اللي ف تلج
واحلفلك
رغم الزحمه وبرد الخلق
هتشوفي أعظم سرعة بخر!!
كام خطوة موج
على قلب الصخر
اتحضنت شبكة
ولا طرحِتش..
وفنار مرعوش
مهزوم الضل
اترجى في نوره مايغرّقش..
من خطوِك .. نوّه
بتحدّف شوق مليون خماسين
بتخربش جرحي ب ملح سعاده
و اما أتبسملك..
واتفادى الريح بالروح شمسيه
استهوى لوحدي ب نزلة عشق
ينحسر الموج
وبجزر مفاجئ
عن شط خراب
وازاز متكسر
كورنيش مش قلبي
واتمدد وشم في لوحه حديد
" ممنوع الحلو يزور المالح"
