هى يعنى بعيدة على ربك؟
هشام صبح
هى يعنى بعيدة على ربك
انك تصحى فى يوم
مبسوط
روحك خفتها كما فراشة
فى ربيع العمر
والقلب مرفرف بالفرحة
و الفرحة مالية الدار بعمار
عناقيد النور
داير ما يدور حوالين البيت
والصوت العذب بيتغنى
بآيات النور
والاهل,قرايب او أغراب,
واقفين صفين كده يتمايلو
صفين صفصاف
و الزاوية العتمة تحت البيت
مليانة زغاريط
سلم يا مريد
على صاحب زفة عمرك
واقف يستقبل حضرة معاليك
بالحضن الدافى
و دمعة شوق
و تبص وراك
ماتلاقى الا جناين فل على الجنبين
محفوفة بريحة من الياسمين
و الناس تتغنى و بتسقف
فرحة بلقاك
ياخدك من ايدك
تتسائل:
ايه سبت وراك؟
الجاى احسن والا اللى فات؟
يترعش الرد اللى فى عقلك
:الخوف م الجاى
مش ع الرايح
تتمد ايديه على شاى بحليب
رايق صافى
و فى وشه البسمه بتتفجر
ينابيع حكمة هالة عليك
تتفتح أبواب العظمة
يغمرك النور بجلالاته
و تجلياته
أصوات من غنوة للحاضرين
تعلا النشوة
و يدوب الكون
ميعودش الاسود لون موجود
ما اخيرا قدر الأبيض
يغسل قلبك
هى يعنى بعيدة على ربك؟
والنبى ما بعيدة
