اغنية للقاهرة
زين العابدين فؤاد
أغنية للقاهرة
عريان ونادر هِدْمتى ليكى
شاعر، وشايل ع الكتاف قلبى
فتّحت عينى وسط حواريكى
عيّل بيلعب ع التراب، يِحْبى
وحدفت عينى اصطنت واسمع
الموت بيرقص رقصة الكوليرا
جوّه البارات بيعلقوا الزينة
والفلاحين، يتباعوا فى المينا
يا أمى العجوزة أم البيوت أكفان
أم التراب، سجَّان
فاكرة ولادك؟ والدِما أنهار
والموت بيرقص رقصة الكوبرى؟
فاكرة يناير والشتا، والنار؟
فاكرة الحرايق، فى العضام تسرى؟
طَلْقْ الرصاص يِدْوِى، وأنا باجرى
تُقْل الهرم يطبق على صدرى
ياما نفسى أنام دفيان على صدرك
وأسقى عروقى حب، من سرك
وفى يوم لمحتك جنب بيت ماشية
لابسه دهب، بس القدم حافية
وبامدّ إيدى أمسكك، تُهتى
تاهت عيونى والضرير، يِجْرَحْ
كلمة شفايفه فى الجبل، تدبح
يا أمى العجوزة، إنتى مين؟ قولى
ولمين لبستى الورد، واللولى؟
لولادك اللى فى القنال ماتوا؟
ولا اللى باع هِدْمَه على مراته؟
والإنجليز، فاتوكى عريانة
مليون جدع غطوكى بقلوبهم
كل الحوارى بايته عرقانه
ترقص لهم، تضحك، تلاعبهم
يا أمى العجوزة والشعور شِيْبَه
هبّت عليكى ريحة من "طِيْبَة"
رمسيس بيضحك ضِحْكُه على بابك
يحضن عذابك، إنما يضحك
والأهرامات ترقص على ترابك
والسر جوّه الصدر ما اتحرك
يا أمى العجوزة إنتى مين؟ قولى
سد وحديد فى أسوان، وفى الشلال
والفلاحين لو يجمعوا اللولى
هيرقَّصوا المَوَّال
وإنتى يا نايمه ع الطريق جنبى
إمتى تصبّى السر فى قلبى؟
ده أنا نفسى أنام عريان على صدرك
وأسقى عروقى، دم، من سرك
من ديوان وش مصر
