حوار مع النفس
هشام صبح
حوار مع النفس
و عشان تمشى طبيعى -
زى الباقيين
امسك دفتر أحلامك
قلب فيه
قيس أحلامك
باللى هتقدر توصل ليه
انسى الدنيا و سد ودانك-
و لا تسمعش لأيّها واحد
باع احلامه فى نص السكة
و قالك
راضى-
يعنى أنا كنت راح أعمل ايه؟
صعبة السكة
ما انتاش واصل
كنت وصلت فى مرة أنا قبلك
والا يقابلك
حظ معاند
ياما قابلنا-
ولا بيسيبنا
بس ما سابنى فى مرة
صديق
والا أخويا
مهوش من امى
ولا لأبويا حق عليه
خد من قلب الدنيا رفاقة
مش سرّاقة
و لا كسارة للمقاديف
خد من بق السبع حبيبة
تسند قلبك
ساعة الخوف
خدها كمان بتحب النور
سيبك م اللى بتسعى لحيطة
تحمى جبينها لو فيه شمس
-كنّك بتقولها يعيشها وحيد؟
-بكره الحلم يشق الصحرا
تطرح بساتين
حبة صبر
-من الصبّار؟
-مر العلقم و انت بتسعى
طعمه جميل
-بدنك
حقه
هيروح فين؟
-صاحب جوعك
صاحب عطشك
بكره هيروى الصبر الريق
-عمرك
أمرك فايت وسط الريح
-و الله ماشايف
غيركم مجاريح
عجز الحلم فى تراتيلكم
و اتهدل غَبَر الذّل على جبينكم
و اتمنع الشوف
-خليك ملهوف
تجرى ورا سرابك
بكره تقول
كانوا العاقلين
-و انا راضى بكونى
من المجانين
الراحة فى سعى
مفيهش وصول
