الدبله الفضه
أسامة سند
الدبله الفضه
بصت لشعاع القمر اللى إتوضى على جنابه
مكانتش بتحتلم النار اللى خدتها ف طاسة الخضه
وأنا لسه وهيا ف إيدى بحن للمسة إيدك جواها
بتملى ف حزنك
والبحر
و أسماء الناس
يا صباح الخير
ع الموت اللى لمسته ف حضنك
والا على العيشه اللى بلملم خطاويكى
على غصونها الدبلانه ؟
والورده اللى إتزرعت جوانا ف أول يوم للقا
قطفتها أيادى جناينى عبيط
كان نفسه يبوس الجنه ف عور خدك
يا صباح الخير
على وش الضيف اللى مسافر ف الدم وحيد
والا على البيت اللى إتيتم م العيد
والا المواعيد اللى رمتنا بأشواقنا بعيد عن بعض ؟
البعد ملوش أكتر من بعد نبص عليه
من بعد
القلب اللى إتمرمغ ف عصير إدمانك
صدى
وبرغم كده
عمرى ما هقلع دبلتك الفضه
