أنا الأدرى
هشام صبح
و عشقت فيكى ريحة الايمان البِكر
من قبل ما يخوضه الكلام بال(ليه)
و رسمت شِعرك فوق الجبين
جنة
و انتى بتتعايقى بسحر الشرق
احنا اللى علمنا الكروان سر ترنيم الفجر
و من حسنا
كانت جناين من الشهوة بتتفجر
فى أول يوم لقا آدم مع حوا
أنا غجرى
متسألينيش عن القاعدة
أنا السحر الساكن كل نبوءة كانت من العارفين
أنا النجم المتدارى تحت حد الشمس
و لما جه أوان يظهر
نسيوا السنين اللى لجلهم جيتها
و غنوا للقمر,
بالقرب.
أنا مِنك
و حلمى لو يطول حلمك
هيتحول رذاذ للبحر لما تتشقق الموجة
على شَطُّه
أنا أدرى
باللى انتى لسه مدريتيهوش
بحكم السن
و كم كبير من الاحلام
على جدار قلبى بتتعكز
و كم أكبر من الخسارات اللى تبان
_للعجب_
عادلة
و آلام فى الضهر من تنطيط على السكة
و خمسة جنيه
حق التاكسى من المختلط-عيساوى
عشان فاتحة تبل الريق
أنا العارف
انا الأدرى
بان اختيارك كان العقل
و ان اختيارك منى محض جنون
أنا العارف
انا الادرى بعجزى عن قولى
متسيبينيش
أنا الأقدر
فى عز الكِبر اتنازل
و أقولهالك
أنا آسف
على وقتك
