رسالتى للى مش نازل الميدان
الثورة فى الشارع
والقلب مليان بالضحايا
لو ضحكت إضحك معايا
بس الوقت الجد إعرف
لما أموت
يبقى شرط تموت معايا
أو تهد الخوف ورايا
تبقى روحى فى الميدان
الوقت .. مش محتاج جبان
إوعى أسمع يوم بجملة :
( أهلى مانعنى النزول )
لما يبقى باب فى شقة أقوى من صوت الوطن
لو اهلك أقوى م النظام
إوعى مرة تقول يا ثورة
أو تهاجم يوم فلان
أو تطالب يوم بحرية وطن
فى فرق انت ماتعرفوش
بين الأمانة والأمان
إوعى يوم عينك تدمّع
لو لقيتنى رسمة بترج الحيطان
إوعى يوم عينك تدمّع
لو لقيتنى رسمة بترج الحيطان
