الوحدة مش اربع حيطان .. الوحده هنا / و اشار الى قلبه
حنان الجوهري
تقعد لوحدك قافل شبابيكك عليك و قافل الفيسبوك و التليفون و تفتح رغيف الفينو و تملاه جبنة و تاكل لوحدك و انت بتتفرج على فلم على اللاب توب .. مش متابع الاخبار تقوم تعمل قهوة تسحب سيجارة من العلبة مع انك مش بتدخن كتير .. تاخد اول نفس و تلحق وش القهوة من الفوران و الهروب من انه يكون اول شفطة .. تاخد فنجانك حبيبك لاوضتك تفتح رواية تقرا و فجأة تقرر تاخد دش بمية سخنة لحد ما مراية الحمام تشبر. تنام براحتك تصحى تنام تانى تقرا تزهق تبص من ورا الشباك تقلب ف قنوات التلفزيون و تجرى بالريموت لحد ما تلاقى مشهد تشوفه تستمتع بكام كلمة تقلب ما تلاقيش حاجة تطفى الشاشة و تطفى النور تولع سيجارة تقوم لحد التلاجة تفتحها تبص و تقفل تانى كأنك بتطمن على ان الجبنة موجودة و ان البيض لسه مكانه مع انك قاعد لوحدك ما حدش هييجى ياكله معاك تفتح الفيسبوك تدخل اوف لاين تتفرج على البوستات تبقى هتتجنن عشان تعمل لايك لحاجة عجبتك بس لو عملتها هتتقفش يا معلم .. تروح و تيجى براحتك تنام زى مانت عايز تقرر امتى هتغسل اطباق الغدا او حتى تأجلها لبكرة .. تاكل اللى انت عاوزه حتى لو هتعمل سندوتشات مكرونة .. لا اكل صحى و لا منمق ولا بيت لازم يتروق .. يومك هتقسمه زى مانت عايز : نوم ثم نوم ثم كوب شاى بلبن ثم نوم على الكنبة – تغيير المرة دى – تلبس شبشب الحمام ف البيت عادى .. تعلى صوت المازيكا اللى انت بتحبها .. تتغدى ثم نوم ثم دش فوقان و كتاب مع كوباية نسكافيه .. حياة ممتعة طبعا يا ترى هى دى اللى بيقولوا عليها الوحدة ؟ هى الوحدة انك تبقى عايش لوحدك ؟
ناس كتير تلاقيك عايش لوحدك ما تعرفش انك مستمتع بحياتك و فاكراك زهقان مش لاقى حد يكلمك و لا يعيش معاك ما يعرفوش انك لما بتحتاج الناس بتروح لهم بتقابلهم .. ناس انت منقيهم مش مفروضين عليك .. فيه ناس كتير ممكن تبقى حواليك ف البيت عاملة لك دوشة و رايحة جاية حواليك و بتاكل معاك و بتشغل الحمام و بتقلب ف تلفزيونك و بتاخد شاحن الموبايل بتاعك و بتلبس من هدومك بس انت من جواك حاسس بالوحدة معاهم ..
الوحدة احساس بالغربة مش انك عدد واحد فرد فى بيت .. صاحبك اللى انت مختاره شبهك فاهمك و بيفهمك اما تسمعه حتة مازيكا و يسيبك اما تسرح و ما يقولكش مالك .. تنزلوا تقعدوا على القهوة سوا او تتمشوا او تلاقيها بتكلمك الصبح تظبط معاكى تتقابلوا و تروحوا تشوفوا المحلات مع انكم مفلسين " يا بنتى هنلف بس " .. تتقابلوا تكملوا بعض ساعتها ما تبقوش وحيدين مع انكم نازلين من بيوت فيها ناس .. الوحدة بتيجى من الناس اللى حواليك .. بيبعدوك عنهم من غير ما يقصدوا .. ما يسألوش عليك اما تكون محتاجهم و اما تكون عايز تبقى لوحدك تلاقيهم بيطاردوك بكلمة " مالك " ..
لو خدوك ف حضنهم فى لحظة احتياج هيكسبوك بس للأسف ما عندهمش مؤشر انت محتاج امتى .. ساعتها بتبقى وحدك فعلا مع انك وسط الناس ما تخليش حد يحسسك انك وحيد عشان عايش لوحدك .. لأنه ممكن تكون وحدتك وسط الدوشة مش شرط اربع حيطان حواليك ممكن يكون قلبك عمران بالناس
