لسه الطريق واضح
أحمد البوهي
تايهين في سكة امل
واليأس شىء جارح
امتى التاريخ يتعدِل ؟؟
دا اليوم كما امبارح
الصبر ضاق بينا يا بر رسّينا
ليه الطريق ضلّنا ..
ومبقاش فيه شىء واضح
،،
....
واضح اوي لعبهم والبطء في القرارات
شغل اللي باع ما اشترى
لعْب التلات ورقات
ما خلاص شبعنا سكات
ومشينا وسط طريق
فيه الامل بارح
.....
واضح اوي لعبهم
والعند بزيادة
احلام لناس زيّهم
داسوها ببيادة
بيصادروا احلامنا
وطريقنا قدامنا
ياما الأمل لامنا
وقلنا هنقاوح
......
ليه التاريخ يتعاد
والثورة جت بمعاد
مات في سبيلها شهيد
حضن الرصاص بعناد
ياحلم لسه بعاد ولّا احنا قربنا
الحلم غرّبنا
لكن الحنين سارح
....
مكملين مشوار ,, هنجيب لـ ليلنا نهار
يابلدنا ليه نحتار .. طول م الطريق واضح
