أنا رسول
هاني مهران
قَطَّعْ قصايدك
وانْحني قُدَّام قصايدى
وافْتخر إني أعرفك
واعترف
إن الكتابة للوطن مش شيء بسيط
وإن الوطن محتاج قصايدي
زى ما قصايد جنابك عايزة شاعر
مش راح أكتب
عن ليالي الشوق ف موسكو القايدة نار
أو نهار بُرُومِيثْيُوس المصلوب قدر
أو أخالف نص في القرءان
عشان يقولوا فيه جديد
كل يوم ف بلدنا تلقَى فيه جديد
في التحايل ع القانون واللوايح
فيه جديد
في الهروب م المسؤولية
فيه جديد
في الوسايط والتعامل بالرشاوى
فيه جديد
حتى في طريقة الإهانة وف المزلة
فيه جديد
ايه يفيد أكتب عن النبض اللي ساكن جوا أشلاء المشاعر
منحني لنظرة عيون الحلم مشتاق للربيع
وأنا كل يوم بعمل خناقة عشان مواصلة
وأنحني للسواقين
وأبتسم عشان أمضي بدري
ايه يضيع منِّي.. كرامتي؟!
شيء مش ضروري ف الوطن ده عشان أعيش
ما يهمنيش طول المسافة المُبْهَمة
بين الحدود لللأوليَا والأنبيَا
أو فن تجريد المعاني
أو رسوم للمملكة فوق الجدار المرتجف خوف وانفعال
ما يهمنيش شعر العيال
****
ما يهمنيش غير المسافة المُدْرَكة
بين وقفتى ف آخر الطابور والفرن
بين الكتابة للوطن والعمر
بين انكسار الحلم فينا والكلام ع التنمية
بين الحياة الخضرا اللي ف عيونهم وبينَّا
بين قصايدي وبين كتاب المدرسة
بيني وبينك والوطن
بين الحياة وبين الكفن
****
القصيدة ثورة حرة
بتنطلق
لجل انقلاب ف الفكر
وأنا صاحب الثورة
وأقدر أكتب عن تَضَاد الظنْ في نسيج الملامح
وانْعِزال الأوردة ف جسمي النحيف
والرياح المعدمة في جرد المشاعر
والآهات المبهمة الغير مُمْكنة
ومتْمَكِّنَة ف نحت التجاعيد الخفية ف قلب شرايين الفرح
أو فن تفسير الرؤى ف ظل ارتحال (يُوسُف)
- {(إني آنست ناراً )
وخلصت ارتحال ف الشعر
وانفطر الحنين واليأس
وجئتُكَ من إمبابة بنبإٍ أكيد
سندوتش الفول بقَى بجنيه ونص
اكتب ايه ؟!}-
أرفض الوحي اللي جايلي
وأختلف عن مبدأي
وأكتب قصيدة مزيفة عني
وعن وطن انكسر فيه الأدان للفجر
مشنوق ف القصايد غصب عنه
وانكتب
لكنه لسه ما اكتملش
ما انهزمش -أنا مش هبطَّل شعر -
أنا هفضل أكتب ع الوطن
ما يهمنيش مين امتلك للعرش!
أنا كنت ما بقفش الطابور ف المدرسة
علشان ما حييش العلم زي العيال وخلاص
وعشان كدة واضح ما بينا الاختلاف
كان العلم بيحبني لوحدي
أما انت من ضمن العيال خواف
غصب عنك ترتجف ترفع إيديك
وعنيك تلف على الأساتذة
عمرك ما بصيت للعلم
وعشان كدة عمرك ما حسيت بالوطن
فيا ريت تكفَّر عن قصايدك
تنحني قدام قصايدي
تفتخر إنك عارفني
تعترف
إن الكتابة للوطن مش شيء بسيط
وإن الوطن محتاج قصايدي
زي ما قصايد جنابك عايزة شاعر
