دم النخيل
عمرو شاهين
دم النخيل
مفتتح
....
مش غلطتى
انى اتولدت بنص قلب .. ونص شراع
امى اتوحمت ع البعد
علشان كدة
بعرف افرد نفسى طريق واعيش حالة السفر ..رغم الثبات .
....
مختلف
زى صوت ادان المغرب فى الصيام .
مجنون
زى طفل بيلبس العيد قميص ..
ويدور يفرقع فرحته ف الناس .
فبلاش تحاولى ..
تفردى الاسرار ستارة ..
تخفى بيها..
نظرة الرعب ف ملامحك م العلاقة
واجب عليا انى اعشقك
ومن الضرورى انك تخافى
من امتى النخيل
بيعشق الطوب اللى بيجرح كبريائة ..فينزف رطب ؟
كان شئ طبيعى انك تحسى بالامان ..
لحظة ما قررت البس هدومى ..
واخبى الليل فى جيبى .
مين اللى قال ..
ان النجوم فياجرا العشّاق؟
برضوا الحرارة قادرة تخلى العاشقين ..
يستسلموا للحلم .
فياريت تطلقى اشلاء ملامحى م الصور .
انا اخر ولد فى الكون
يقدر يصالحك بالدفا .
انا الولد الوحيد فى الكون ..
اللى لو زاره الامان .. بيخاف .
