زى النهاردة
زينب فرحات
شباك ع الروح بيطل
ولإن العتمة محاصراها
والقلب الأخضر عطشان للضى
ولإن الضى عزيز وبلاده بعيد
فماكانش بإيدهاغير تفتح
شباك يمكن منه الضى يهل
اصل الشباك على روحها كان بيطل
................................
عن يوم عدى وفات
عن الذكريات
والأرض المحبطة
عن ناس مش م البشر
وفرحة أخرانية
وثورة مكملينها
وحلم بيواعدنا
بنصرة تلمنا
زى النهاردة
------------
انا زى ماانا واللاب زى ماهو وصوت المذيعة السخيفة خلفية للمشهد
حتى شعور الإحباط واحد ما اتغيرش
حاجة واحدة اللى ناقصة
هى
ماما
زى النهاردة من سنة
مش فاكرة امتى بالظبط
كنت برده بشيت مع صاحبتى نفسها
وبقولها ياكش تولع
بيتكرر السيناريو
خطاب جديد بس المرة دى الديكتاتور ما شرفناش بطلعته البهية
بحط السماعات عشان اغلوش
وما حسش بالدنيا، ماهى مش طالبة اعراض ما بعد الخطاب من اغماءات وقهرة، كفاية شعور العجز المقيت بإنى مرزوعة فى بيتنا
والناس اللى بجد واقفة بتواجه قدرها وقدرى لوحدهم
لولا بس ضعفى قصادك يا ماما
بصيتلها
اللمعة دى ما شفتهاش فى عينيها من يوم وفاة اختى، ايه اللى مفرحها كده
وفجأة...سمعتها
احلى زغرودة فى حياتى
واخرها برده
ماما أول ما سمعت خبر التنحى جريت ع البلكونة ووقفت تزغرد
صوت الفرحة والحرية
حقيقى ما اتكتبليش انى اسمعها منها فى تخرجى زى ما كانت واعدنى
ولا هسمعها فى زفتى وأنا عروسة ، ومش مكتوب لولادى يعلنوا عن وصلهم للدنيا بأحلى فرحة من جدتهم
بس يمكن هى دى الحكمة
ان أخر مرة اسمع صوت الفرحة يكون يوم النصر
يوم ما ربنا جازى صمود عبيده
وباركلهم تغييرهم ما بأنفسهم
عشان كده كل أما احباطى يوصل لسقفه بغمض عينى واسمع صدى أخر زغرودة لأمى الله يرحمها
وعندى يقين إن اللى خلقنا هيجازينا جزاء الصابرين
وهينصرنا
وساعتها كلكم هتسمعوا صدى زغرودة امى
فى قلوبكم
مش فى قلبى لوحدى
♥
