ضهر المدينة سفينة
على مينا مابترساش
جوف المدينة صروح
ضهر السفينة مدينة
احلامها ما بتهداش
هَجَرت وطن مجروح
..
..
قَلب المدينة..الامنيات
الأسئلة والانفلات
وشروعك الممنوع
روح المدينة..الفاترينات
سيخ الشاورمة والبارات
والفَلَس والجوع
نَفَس المدينة..سيجارة
سَحَبها امس الذكريات
من صدرها المرمر
على صدرك الموجوع
فَجر المدينة غياب..
ليل المدينة رجوع
وانت اما كنت هناك
صوتك مابانش بعيد
واما ابتدت تنساك
كان الصدى بيزيد
تتباعد المسافات
تتشتت المواعيد
ما انت الحبيب مرحلة
انت الغريب ترحال
عاشق وقلبه اتملى
للغربة ميت موال
مقتول شجن للوطن
مغزول بصبر جبال
مغسول ببحر دموع
حبيت عشان عشمان
وقسيت عشان ندمان
ومشيت عشان يفضل..
القلب تحت الطوع
والعشق ليه ميت سبب
والجرح ليه ميت نوع
حنيت عشان تايه..
وبكيت كتير وحدك
بس البكا اللي بجد..
هو البكا المسموع
سمرا ومن بَعدها
كل السكك مشاوير
سمرا على بُعدها
زاعق غُنا العصافير
عاشق وفـ الترحال
قلبك اسير المحن
صوتك ضمير الوطن
وطنك اجير الزمن
زمنك مالوهش ضمير
وبرغم عشقك تَرَف
من أوله..فـ اخره
حلمك مالوهش نصيب
وبرغم قربك شَغَف
حاول يجيب اخره
جاهل فـ علم الغيب
وحده الرصيف اكتشف
إن انت كنت غريب
وحده الرغيف اتكسف
من شهوة التعذيب
وخدوك على القهوة
يقرولك الفنجان
وسابوك على سهوة
حاسبوك على النسيان
وحاسبوا ع المشاريب
