ف الشارع
مش عايز افضفض ولا حاجه
مش عايز منكم ولا حاجه
مش عايز عيني تيجي ف عينكم
ولا عايز اكون كده علي دينكم
أنا رايح شارع مش عارفه
هفرش ع الأرض وانام بهدوء
واتمرمغ ف تراب يشبهني
وهنوّنو للقطة الماشية
والاعيبها وادقق ف عيونها
نتمشي أنا وهي ونحكي
فاحكيلها عن الناس الماشية
التايهة الواهية المنتشية
واحكيلها ازاي وقعت روما
وازاي بيكون تقشير تومة
و(أخيل) ازاي مات من كعبه
وازاي فيه زعيم يقتل شعبه
وازاي بيشيل الصخرة (سيزيف)
وبيفضل يرفعها يوماتي
هحكيلها عن الزمن الآتي
الاعمي اللي بيبقي ساعاتي
واحكيلها كمان عن فتح الباب
فتح الأبواب أقصد يعني
ازاي بيكون أولها بريق
وآخرها بتزهد وتزُقه
واحكيلها ازاي قلبي بيعشق
(هتحس_انا عارف_ بيا أكيد )
وازاي ف عيونها فيه شيء ينشأ
وازاي إحساسي و(هي) بعيد
هحكيلها علاقة دفع الوقت برسم دواير ع الجدران
وازاي يهرب من إيدي الخيط
مع إني بكون بضمير ماسكه
وازاي السمكة تعيش أحلام
انها هتطير تسكن شجرة
ويحبها عصفور مش (كاسكو)
لاكنها بتفوق م الأحلام وتعوم دوامة من الأيام
وتنام وتقوم وتقوم وتنام
زيي تمللي
هحكيلها ازاي سلمت لناس
وازاي الناس استلموني
وازاي ف الوقت الصح يكون
الشخص الصح ماهوش موجود
وازاي العكس اللي بيحصل
هزهق م الحكي واغنيلها
موعود .. موعود
فتنوّنو وتقولي: بنوصل
فاسرح ف عينيها واقول: علي فين ؟
فتقول: ع البيت.
فاهرب ..
وانا بجري أبص لها
وبعزم ما فيا عينيا تقول :
أنا عايز أفضل ف الشارع
جربي نتبادل ف الادوار
باتي انتي ياقطة في بيتي وابات
علي ناصية شارع .. ف جنينة
مش عايز حاجه من الدنيا
أنا زعلان .. والدنيا حزينة !
