يا بحر خف الموج على شطي
موجك بياخد منه مابيديش
عمال بيرمي ... حمول وبتغطي
رمله شطوطي ... ميه ما بترويش
نازل بتنحت فيها وتخطي
مابقاش فاضلي شط مابيبكيش
ملحك بصل ودموعي بتندي
بس الندى ع السر مابيكفيش
مدك غواني ... فتحت انا يدي
عشمان فـ مره الجذر ما يفوتنيش
كيف العوانس ... خدي على كفي
الإسم سيل ... والطمي برضه مافيش
عمال تجيب في حدودي وتودي
هي المراكب ع الشطوط بتعيش
لا انا عدت عارف ... انا أد إيه أدي
ولا خريطه انا ليا ... ولا ماليش
حتى الخطوط مرسومه على يدي
بتقول خلاص ... الوقت ما يكفيش
تستنى تاني البحر ... يوم يهدي
أجمل عرايسه ... لشط ما يدفيش
اصبحت مرسى للقلوب تاني
الصيت غاويهم بس أحزاني
كاسراك يا موج ومصفياك مـ الفرح
ما نايبني منك غير ملوحة الجرح
وبقيت انا والبحر متواعدين
يرمي حموله عليا بالملايين
شمسي الفقيره يا دوب تطمنهم
يرجع ياخدهم مني متعافين
وارجع انا والبحر نتسامر
دا الليل طويل الليل مالوش أخر
أصلي بنام بلاقيني بتاخر
موجك يا بحر جاذرني ع الأخر
