عمر بنات اعدادى
ما اتفقوا على حب مدرس واحد
وكل واحدة تنسج قصة حب مع مدرس
ولو معندناش غير مدرس واحد
نختار مدرس من فصل تانى
وف النهاية تلاقى نص الفصل اتحجب وبيعيط
والنص التانى قص شعره زى المدرسة
اللى خطبها المدرس
وتسود حالة احباط عامة
ف المدرسة الاعدادى
بيعجبنا الاكلاسير بندارى بيه صدرنا
مع اننا بنبقى فاتحين الزراير باعتبارنا ناسينها
بنكتشف
الجيبات الضيقة
والفتحة اللى بتجرجر عدد اكبر من طلبة الثانوى
اصل قدام كل مدرسة بنات مدرسة صبيان
احنا ليه مش فى مدرسة واحدة؟
اول ميعاد
بتلاقى البنت باترينة
بلمسات كل البنات من الجزمة والشراب
لكل التفاصيل الصغيرة عشان البنت تبقى جاهزة لاول ميعاد
مع البنات كله سلف ودين
احلام اليقظة
بتخللى بنات اعدادى
تكتب جواب لعبد الحليم نع انها عارفة انه ميت
وتعيط بدموع
"سخنة من فيلم " انت عمرى
مع انها عارفة انه تمثيل
بينتهى بيها الحال ف حلم اليقظة
للطرد من الفصل عشان السرحان
الاحلام بالجواز
بتكون حل امثل للهرب من كل السلطات
البنات بتتجوزكتير اوى ف خيالها
من اول خطيب اختها الكبيرة اللى كان مفروض يخطبها هى
لغاية اول راجل
ولما تفوق
تلاقى نفسها ف الدبلوم عشان الاحلام
سرقت مجموع الثانوية العامة
