عن اكتمال الروح
محمد سمير مصباح
هل من مكان لـ اللقا ؟
هل من طريق للسير ؟
يارب عطفك بقا ..
نوّرلي قلب ضرير
أنا اللي سِبت الصُدف
ترميني ف القهوة مع أي رمية زَهر
أنا الغريق ف النهر
ماليش حيتان جواه
لكني بستغفر
يمكن ف يوم أقدر
أعيش سفَر واحد .. من غير ما اقول الآه
هو السكوت مفهوم ؟
هي الدموع واصلة ؟
آسف ..لكن قصدي ..
طب إيه وليه طب طب
طول السكك هيدوم ؟
هل فيه سكك فاصله ؟
معلش ..قصقص دي
من سكتي وطبطب
شداني نسمة هوا
والوحي تاه مني
بنطق كتير م الهوي
وبضل ناس ياما .. من قصة المجنون
يارب عبدك غوي
يتعب قلوب الناس
لو كان في إيدي الدوا
كنت بضمير مرتاح هتعب قلوب برده
إكمن ليها علاج
أنا العطب ف الروح
أنا الخدوش ف الصاج !
مرخي وبلاش ترخيه
حبل الوصال بيننا
يا ورد يا مجروح ..من إيد بشر باردة
حسوا امتلاك الروح ..من قطفة الوردة
أنا كنت جايلك ليه ؟
زاد الوجع سِنه
الحُب مش برواز
يجمع ف ناس وخلاص
الحُب هو اللقا
قبل الميلاد بزمان
قبل اما اشوفِك هنا
ف اللا زمان ومكان
قبل الوجع والنوح
....
انتِي الوصول للفرص
انتي اكتمال الروح
هو انت ليه يا مطر
تمشي اما بحتاجك ؟
وقت اما اعوز اهرب
واتخبي فيك وابكي
من حظي .. دا ف الصيف
ولا انت زيي يا مطر
ف الدنيا عايش ضيف ؟
ياليل ياعيني يا ليل
ياليل غريب وتقيل
ليه ف كل غنوة الاقيك
وانا ليه غنايا عويل
هل فيك ميعاد للفرَح ؟
هل فيك وفيك أو فيك ؟
فيه لسه شيئ يتجرَح
وانا قلبي بيسليك ؟
الشعر غربة وسفر
الشعر دا ابن البُكا
يا مداحيين القمر
القلب داب واشتكي
للقلب أحواله
قول القلوب والهوي
ماتقولش مال القمر
والناس تقول: ماله !
كل الكلام فضفضة
والشعر مش غالب
كل الكلام للفضا
ومايمسكوش قالب
جيت ابكي م التوهان
نزل الكلام م العين
وانا قلبي مات او هان
لاكِن ربي مُعين !
