نساي أنا ..
[ نساى أنا ! ]
فى عنيكى . مادنه
. وغيط وبير
فى عنيكى .
حاره ضيقه وميدان كبير .
وطيور غنا .. متعلقه ع المشنقه
في عنيكى .
خماره وسكرانه بسكارى قلوبهم زنازين ضيقه
فى عنيكى فجر ..
فجر وصلا ..
وربيع وسيع
وشفتين مفتوحين م الجوع
فى عنيكى ..
فى عنيكى .. آه .فرحة ولد
فى عنيكى ..
فى عنيكى ..
نساى أنا ..
فى عنيكى سر ..
فى عنيكى مصر ..
بحلم ونا فى حضنك ..
بحلم بإيه . ؟
أصلى صبي متشندله خطاويه ..
نتفة قمر ..
وحلم فى سكة سفر ..
بحلم ونا فى حضنك ..
وحضنك الدفيه .. فى يوم مشتى وزمهرير
وحضنك القدر..
ورقصة الغوازى ..
ورعشة الغجر ..
ودقة الشواكيش ع المسامير ..
بحلم ونا فى حضنك ..
وحضنك الصبابا ع الشطوط بتحلم بالقمر ..
إيديا دول ..
ريتهم يكونوا أربع أيدين
اتنين حزام على قدك الصاحى
واتنين ألم النجم صباحى ..
بتعيشى وهم كبير
حواليكى بيغنوا الفوارس فوق ضهور الخيل
ومخبيين السناكى .. في جراب الليل
جيت لك ونا ماشى ..
على كتفى حمل تقيل ..
جيتلك ونا ماشى ..
لو كان جمل .. كان عض بنيابه الخزام..
جيت لك لكين يا حلوتى
على صدغى .. وشم أمى قمرايه بشواشى ..
مش وحدى ..
أقدامى .. متشققة بصرخة الكرباج ..
تمن كلام شيخنا فى كتاب البلد .
وكدبة العراف ..
وحسرة السؤال فى كفوف طواف
جيت لك أشيل القناع
مديتى ايدك شراع
شديت لك المقلاع
غرزتى رمشك إبـَر
شرشرتى قلبى شر دمى بحر
عديت عليه وحدى
ونسيتى ترمى لى الودع
نساى أنا ..
نساى أنا ..
شيلى القناع ..
شيلى القناع ..
