إستجماتيزم
أبويا قال
" قبل ما تحرق سفنك ..
نقى الخشب الناشف و
إعمل منه حصان
يمكن تحتاج ترتاح
أو تبعد
الخيل .. أيام منسية
و الليل إسطبل ".
...
من وقتها
بتاخدنى كفوفى لجزع الشجرة
و بتحضن درعاتى جذورها
أحيانا
بتروينى بحكاويها
و تملى بتخضر بحزنى
الشجرة الأم ..أوراقها الصفرا بنات مكسوفة
و أنا حلمى أضغاث صبيان
بصتلى و قالت
" ده اللى بيتكعبل فى كسوفه من الوِحدة
الدنيا بتحن عليه و تبعتله عيال ".
...
قال العجوز
هو اللى شال الحلم شنطة ع الكتاف يقدر يعيش مفرود ؟
صبرك قليل ع الملل
إضحك لو لقيت نفسك بعيد
إضحك لو لقيت نفسك قريب
إضحك لو لقيت نفسك بجد
الضحكة سكة و موت و حد
وإنطلق بين البلاد
مطرود بيخلق جنة للمطاريد
....
أمى قالت
دايما بتبص على السما من وجهة نظرك
بتضيّق بإيديك الكادر
و تلف صوابعك زووم
يمكن تشوف الوحى
بيلملم أفكارك قش
و يهديها لطير / غريق
ف يشفعلك و تبطل حزن .
رديت
دايما ببص على السما من قلبى
و أنا قلبى أساسًا نظره ضعيف .
