جيل 80
مصطفى حسان
إهداء
..
للجيل اللي كان مصروفه نص جنيه
اللي وعي على فكرة القدوة
اللي كانوا بيتابعوا برنامج العلم والإيمان بمنتهى الشغف
اللي لحقوا نزار ودرويش ومصطفى محمود والشعراوي ..
اللي كانوا لسه بيقدروا فكرة الفن ومش لازم يكونوا فنانين
اللي كانوا بيستمتعوا لما يسمعوا أغنية حلوه
اللي كان أقصى درجات الإسفاف بالنسبه لهم هشام عباس ومصطفى قمر
....
جيل 80
...
تحية لكل واحد
كان في يوم جمعة
قاعد ومستني خواطر الشعراوي
تحية لكل شاب في يوم من الأيام
تابع ذئاب الجبل
تحية لكل شاب في يوم من الأيام
ع الحلم كان ناوي
راح الأمل منه وعدى سنين
تحية لكل جيل 80
..
وحشني الفصل والدكه
ومصروفنا اللي كان فكه
دي كات أيام سرقناها
على جروحنا بتتكى
يا حوش المدرسة الواسع
يا أجمل من طفولتنا
وحصة عربي/ دين وحساب
مسحنا الحوش كتير جدا
في حصص الرسم والألعاب
وشب الطفل ياما وشاب
ولسه بيرسم الدكه
وحلم طفولته عمره ما غاب
..
تحيه لجيل
طموحاته ف لبان سحري ونوجه
وعم مدبولي يا "شاطر عمرو"
يفوت يا صاحبي بيك العمر
ولسه الجرح نفس الجرح
لسه بتسأل العصفورة يومياً
"بيتك يا عصفورة وين"
..
زمان الحلم كان ساذج
وكان الليل علينا يطول
فنرسم حلمنا دايماً
في آخر صفحة في الكشكول ..
زمان انا وانتي كنا روحين
ماكانش الذنب يقتلني عشان بوستك
عيال بتحب على روحها
وكان القلب زي الشارع الواسع
يساع من كل وردة كتير
زمان انا كنت بعرف اطير ..
زمان انا كنت بشتاق لك
بقوة طفل بيعيش الحياة بلذه
وأقصى طموحنا تشبيكة إيدين
ماكانش الهم طال روحنا
ولا عدى على جروحنا
ولا اتخيلت يوم الحب يبقى سر مأساتنا
وكان حلمي ككل الناس وطن كما سائر الأوطان
عايشين عشان نلقاه
صار الوطن مأساه
...
كان حلم أتفه ما يكون
زي العصافير ع الشجر
بتطير وترجع للوطن
كما أي كائن في الوجود له بيت
ولسه بتسأل العصفوره يومياً
"بيتك يا عصفوره وين
بيتك يا عصفوره وين"
..
تحيه لجيل في يوم كان لسه جيل حالم
وقبل الغربه ما تقطع شرايينه
وتدبح فيه ..
ماكانش الشِعر بيضحّك
ماكانش الحزن صار إفيه
ماكانش الحب في الروايات
ماكانش الحضن شيء فاضح
ماكاتش قلوبنا موقف ميكروباص
..
وليه ما اعرفش لسه بحن
لكلمة كتبتها في الفصل عن وطني
لإني كنت ساذج إلى الحد اللي خلاني اقول
(وطن يعني سما وأرض وبشر بتحب بعضيها)
كبرنا .. يا ريتنا ما كبرنا
وكنا عيال
سذج قوي وأغبيا
كات السما بتضحك معانا كل يوم
بتوزع الضحكة فنرسم فوق قلوبنا بالرصاص
كبرنا .. واكتشفنا ان الرصاص
هو الرصاص
والوطن غير الوطن
...
