قبل ما يعلمني الرقص
اجمل لحظه في شيزوفرينيا حبنا
لما نبني حيطه بانتوماين ما بينا
ونتخيل اننا بنرقص تانجو سوا
على صوت احمد عدويه
استخدمي
الحزن عكاز للفرح
وقابلي الصبح بابتسامه من قلبك
الصبح من بسمتك
لابس ربيعي
... وطعم الحزن في عنيكي لابس شتا
هي كلمه واحده
بتعرف تخلينا عكس بعض
بقولها لمّا أزيد في القرب
واشتاقللك بقوة طوفان
وبتقوليها لمّا تنسيني
رغم كل الكلام اللي بيختلف معانيه مابينّا
ورغم جراح كتير
اتعلمت اجرجرها ف رقبتي
هي أكتر كلمه بتعرف تدبحني
* * *
نفسي أحملك أمانه
مابتشيلش صور الشعر
وزر عين
كفايه تشيل
وصيتي
لمّا اموت ماتلعنيش لهفتي
اللي سبتها
سنين تتربى ف رحابك
لحد ماتعلمت
تغزل دموع تكفينا
وقولي عاشق
ومات
ف بلاش تكون جنازه حاره
والميت عاشق
* * *
لمّا قلبك حَن على غربتي
علمني أبكي م الفرح والعجز
زي ماعلم وشي معنى الابتسام
وعرفت ازاي
كل العشاق
بيموتوا م اللقا
مش م الفراق
علمني ازاي استسلم لسيف اللهفه
بدون مقاومه
قبل مايعلمني الرقص
منبتش على ضهري جناح
وجوّه قلبي ذكريات
لصورك الحزينه
ممكن تكون اتهربدت
من كتر ما اتعانت في قلبي
اللي معرفشي يبطل عرق عيونه
من غيابك
واستنى وسط الحر
قيالة لقا
حضنت قلبي
سرسب دموعه فوق جبيني
حتى ف عز الشتا
* * *
32 سنه بحاول أكون إنسان ..
ف معرفتش
أحاول أحضن عنيكي فاخاف
أحضن إيديكي تعيطي م الذنب
قلبي احترف يصيد الحزن
من قلوب البشر
ويخبيه جوّه دفتر ذكرياته
ماعرفشي ليه ..
يشيل فرحة لقاكي ف دفتره ؟
* * *
32 سنه شايل ذنب قابيل
بين ضلوعي
وماعرفتش استحمل شروق فجرك في قلبي
واستحليت طعم السكات
فغصب عني بقت أسهل الحاجات بين الناس
أصعب الحاجات ما بينّا
وسهلنا
مايقدر عليه الصابرين
رقمك الي بيرقص في قلبي
اتحرم عليّه
والصيام عن ضحكتك موتي
بحلم أطير
وجناح أملي المكسور
مش قادر يشيلني
فابتسم وارقص
أغنيكي ف قصيده
وأبكي
وانتظر وقت اللقا
ماتجيش
وشي اللي بيكره الماسكات
هيتعلم ينتحر ماسك بيضحك
ويتعلم الجديه ف رحابك
ويتخيّل عنيكي مقام جديد للحزن
و تحضني الشوارع
تطبطب على غربتي ف تزيد
و يدبحني البعاد
أرقص
ينخلع قلبي باللقا
أرقص
والكل حوليا يضحكوا
عشان أعرف إني الكائن الوحيد
اللي لسه ماتعلمش الرقص
محدش بيموت ناقص حب
قالتها بخبرة تسعين سنه حياه
وطلعت غلط
بفتكر جدتي
كل ما تتكرر أسباب الزعل مابيننا
فاضحك
انكسف
وأبكي
ساعتها بعرف قد أيه
كنت بجرح نضارتي
لما بسيبها تعاني الوحده
على الكومدينو جنب سرير فاضي
ملحقشي يحضني بدفا
في الليل
ويصعب عليه رقصه سينجل
بيرقصها موبايلي العنيد
بعيد عن جيوبي
رغم إني بفتكرهم خلال دقايق
ف ما بلحقشي أشوف دموعهم
وأستنى أرقص
ف ليل شوارع قلبي
من غيرإيقاع
كنت بتخيلني سيجاره
بتكتك م البرد
جوّه طين الجفا
واتخيلك نجمه
ماعرفتش الطريق تدفيني
ساعتها
كنت بعرف أملى قلبي بالرضا
والبس ماسك الجديه بلهفة قبل ماشوفك
كنت بعرف أخبي فرحتي في الحزن
وكنتي بتطحني لهفتي
شوق
لما تضحكي ف وشي
بس كنت حاسس بالرضا
أيه اللي اتغيّر دلوقت؟
جايز إحساس بالندم
على نظره كانت عنيكي بتسرقها
وتحضني
كل القلوب القديمه
اللي قفلت من سنين أبواب حزنها
وصدت عليه
مش هتقدر تغامر
وتفتح لابتسامه تايهه
قبل ما يبدأموسم الاحزان
فبلاش تقفي تشتكي لربنا
من شباك المطبخ
عشان يزعل مني
*******
لما كانوا الصحاب بيتكلموا عن العلاقة بين الست والعجلة
كنت بحلم بالعلاقة بين الروح والورده
فاكتشفت إني العلاقة المربكة بين ضحكتك والحياة
ف ما تقفليش أوي
لما ف عز الاحتياج
أشوف خوفك علي زعلي حالة ناقصة للقا
وأستنى أشوف الإشتياق بيطل من مشربية عيونك
ف زمن قمة احتشامه ف البلورو
هستنى حضنك وقتهاكلمة
بحبَك وقتها .. شبه نكته
وأنا شبه منتحر
ف قبل ما تبدأ الرقصه
أكيد ما يضرش لو تحضنيني
