تراتيل بلا مأوى | حسن صبري

انا كنت بغني الموج يعلى
والمطره تزيد
يا خسارة كل سنابل قمحك فـ غيطانك
يا خسارة الدره و القطن وبذرة كتانك
مبقاش ولانبته فـ ارضك عارفه تعيش

يا خسارة القهوة ومرق البن
مبقاش الغنا بيأكل عيش
والشعر كلام على نفس الوزن
والمعنى مفيش
يا خسارة الكحك اللي عجنته
اهو طلع الصبح بطيشه بهبله و ارعنته
ما لاقيت مناقيش
ولا كان في وابور
انا كنت مغمي عينيا وبحلم بك
بتباهي بحبك ومفكرني بقيت جنبك
فتحت عنيا لقيتني فـ سجن بمليون سور
يا خسارة الدمع اللي اتصفى
من كتر بكايا على فراقك
اهو راح الضي اللي فـ عيني
مبقتش بفرق بين الضلمه وبين النور

انا كنت صابور على هجرانك
ما زهقت قرايه فـ كُتابك
اّيه بـ اّيه ولا مليت ولا قولت كفايه
ورميت فـ الميا السناره
وصبرت كتير ولا طلعت حتى بسريايه
والبن مرارُه ما غاب من طعم الكوبايه
بلحم فـ سجاره ورا سجاره
مستني اماره
كان املي اشوف صورتي فـ بحرك
ولا يوم بحرك كان لي مرايا
ما شكيت من برد الشتا مره
كان كل منايا المس حضنك
ملقيتش مكان
ولا كان في دفا ولا دفايه
انا كنت بقول الموت ارحم
م العيا و القهر بعيد عنك
معرفش ازاي طلعت منك
بتقدمي كفني وبأرادتك
خدتي عزايا
رجموني فـ عز الضهر وانا المصلوب
تهموني بحبك يا بهبه مقدرتش اتوب
قسموني اتنين قدام عينك
لفوني فـ اوسخها ملايه
وانا كنت بموت وانا مبتسم
مستني وداعك ليا بكلمة "ياضنايا "
انا نادر اعيشلك ميت مره
وان مت هموت فيكي يا حره
يا خسارة العيشه بعيد عنك ( الف خساره )