البنت سندس
عادل عثمان الحجـار
البنت سندس ...
تصحى الصبح تنادي الخير
وبتتشاقى
تجري وتلعب
وبتتنطط فوق الكـِتـف
وتقول جدُّو ...
نفسي تشيلني وتطير بيا / زي الطير
أفرح إنِّي باسمع منها ...
أجمل ضحكه وأجمل حَـرف
وآخدها على أحلى جنينه
تجري وتجري ..
زي المـَجـَري
وتسهـِّم على منظر روعه
أحلى بحيره وفيها الطير
بيعوم حبـَّه وحبـَّه مصارعه
أسمعها تقوللي اأكلهم ..
وأقول حاضر
تفرح وتزأطط تلاعبهم
وتأكـِلهم ...
بس بتسمع كل كلامي ..
لما باقول خليكِ ع الشط
والطير بجعه ووز وبط
يجروا ويبقوا ف ثانيه حدانا
والأشجار والزينه جميله
وقـت الشمس تكون ضُـلـِّــيـله
ونقضـِّي اليوم في المـُتعه
واما باقول يا سندس يللا ..
ألاقيها سامعه
سندس روحي / الله عليها
لما بتلعب تفرح تضحك ...
تاخد قلبي ف حضن اديها
وأحس ان انا لسه صغيـَّر
حاجه تحيـَّر ..
سندس تفرح وتفرحني
والدنيا بتفرح ويانا .
===========
