طعم الموت
محمد عبد المنعم الحناطي
( من ديوان جوايا سر )
طعم الموت
ــــــــــ
تقدر توصف.. طعم الموت؟!
كان الطفل
ف بطن الأم
يحس حياته شهور
هتفوت
وكما العادة
قالوا ولادة
حس بإيد بتشده لبره
غصب عنه كان في الجنه
صرَّخ جامد
أول لحظة بدأ يتنفس ريحة الموت
وبدأ يقلق .. يبكي ويرفس
لو تنساه الأم سعات
وأما اتمررت الحلماتْ
جم فطموه عن آخر
نهر بيوصل بينه وبين الجنة
يعني خلاص لازم يتعلم
انه يقول عطشان وجعان
صرّخ لما طلع له سنان
يمكن حس في أول قطمه طعم الموت
لسه ومصر وعايز تعرف
طعمه ازاي ؟
بُص عليّا
خش في روحي
يمكن ما تشوفنيش من تاني
لا ماتخافش عليّا هشوفك
اللي يموت
بيعيش ويشوف!!!
أما العايش
عمره مايقدر
يوصف أبداً
طعم الموت !!
