يا جميلة
أحمد أسامة
يا جميلة خطّك مش جميل زيك
يا جميلة روحك خِشنة جرحاني
أشعِر فـ حسنك ولّا فـ جبايرك
طَربي فـ نشازك..ولّا ألحاني!
يا حلاوة طابت واشتهيت ضنّوا
عيب اللي يعشم فيكي سوء ظنّه
حَنّوا على اللي استخسرك لكن
ع اللي اشتراكي بعُمره..واتجَنّوا
سَنّوا الخناجر نصلها فـ جوفي
وانا خوفي كان..
ما اصرخش لَاتشوفي
لا كفوف بلون الدم بتدينهم..
ولا رعشة اللي اتسَم فـ كفوفي
ياحروفي قولي الحق لو مرّة!
الديب أكَل..ولّا القريب خانك
الكدب صانك بس مضطرّة
صدقك فـ حق "النّسوة" سجّانك
يا جميلة كِدبك كان جميل زيك
يا أصيلة حلمي..كان فـ إمكانك
