رؤيا..مش وقتها
أحمد أسامة
يومها افتكَرت..
إن ده آخِر لُقا
كان بين كلامَك والوجع
ساذج اوي..وجايز كَفرت!!
كَدِبت يوسف فـ العِجاف
وجريت خفيف ونسيت تِخاف
وحلمت يومها بالبِدع
علشان فَجَرت!!
وفـ لحظة من كتر الشَبع
كسِلت تحسب للسنين
ويامين يعيش
بس السنين في حياة وطن
شيء مايسويش
لَميت همومك كلها ودلقتها
ورميت قصيدة كتبتها..مش وقتها
ورميت دموع ورميت الم... وحجات كتير
ورميت ورق
غير اللي غافلك من سنينك..واتسرق
واحتجتهم..بعد العِناد بسَبع شهور
قَبل المَعاد بسَبع سطور
وسَبع بحور جُوة الغَرق
يوسف نبي!!
يادي القَلق!!
هو احنا مش قلنا اللي فات
كان ملكنا وبِعناه رخيص
هو احنا مش قلنا اللي مات
كان كِدبنا ودَم القَميص
كِدِب القَميص!!
يوسف صَدق
ضحكتني..
والسنبلات رغم العطش
ضحكت عليك من هَمها
عاشت سنين ترقص عشان
مالقتش حد يلِمها
فاتبعترت واستخسرت
ترحل عن الارض فـ سلام
من غير ما تشرب سِمها
ندمان اوي
وبايه يفيدك الاعتراف!
فَرطت فـ دموعك..سَفه
ورميت همومك فَلـْ..سَفه
والرؤيا في عِز الجفاف
فاكر ذنوبك كلها وعشمان تتوب!!
ونسيت يادوب..انك غبي
علشان تصدق ان رَبك
قبل فَجر المعجزات
هيخَلي ديب..ياكل نبي
============
