مش يوريكا أرشيميدس
هيثم نور
أينشتاين يوريكا الحل
قال الظلم غياب العدل
قال الضمله غياب النور
قال اليأس غياب الصبر
قال الشر ده قله خير
وأما يغيب الزاد بنجوع
وعمر الخوف ما يعيش فـ أمان
واللي بيكره عمره ما حب
طب والحزن ده حله فـ إيه
يبقى نسينا الفرح وليه
ننسى إللي معانا وفـ إدينا
ليه نحلم بحاجات مش لينا
لو لينا لازم حتجينا
لو رايحه لسكه ومكتوبه
مهما اتشقلبنا وناديـــنـــا
مش راح ترسي لينا ف مينا
نحزن ليه على شيء مش لينا
فاكر ؟
أول مره يضيع لك قرش
خفت تروّح ياكلك قرش
فاكر أول سن قصفته ؟
رحت بريته وتاني قصفته
فاكر شخبطتك ع الحيط
وإتمديت يومها أنت بكيت
والكوره اللي جابت زهريه
كانت ليله إنما هيه
فاكر أول صفر أخدته ؟
فاكر أول حب خسرته ؟
لا مش دوه ... ده أنت هجرته
قصدي الحلم إللي انت حلمته
فاكر ؟
فاكر لما شربت الكاس ؟
بعت القصه وقلت خلاص ؟
كان نفسي أكمل إحساس
كان نفسي أعيش زي الناس
بس الحكمه دي قاسيه حزينه
بس الدنيا دي غدرت بينا
فاكر لما قفلت الباب ؟
قلت ماليش انا في الاحباب
فاكر لما كتبت حكايتك
غنوه بتنزف لوم وعتاب
فاكر لما حزنت سنين
سبتها تجري يومين في يومين
إنت إزاي دلوقتي ناسيها ؟
شوفت إزاي جريّت بعديها
ألف حكايه وجيت دلوقت
تعشق تاني تغني "ناويها"
طب م الاول كنت تسيبها
تنزل دمعه... التانيه داويها
وكمل
شوف كام فرحه في إيدك عد
عندك فكره وقوه تهد
عندك قلمك ريشتك رسمك
عندك صحبه وناويه تقاسمك
عندك بكره وقبله الليله
ليه ف إمبارح غاوي تمد
كمل
أصل الدنيا دي شيء مسحور
بـيــزغلل لكن في النور
تلقاه خدعه وخفه يد
تتعلمها تصيع على حد
يتعلمها يصيع على غيره
واهي دايره من حد لحد
بس الناصح لما تجيله
تلاقاه نافش ريشه وديله
ويقولها روحي العبي غيرها
كنت زمان بتشد بجد
بس يوريكا خلاص دلوقت
دنيا يا فونيا يا لعبه وقت
