خبيني كده
محمد سمير مصباح
خبيني كده
لأ كده باين
وهبان أكتر لو رحتي بعيد
خبيني ف كلمة تقولها عيونك ف المواعيد
خبيني بجد لإني بخاف ..
أطلع ف الصورة غريب ووحيد
خبيني كده ..
الناس بيشوفوا اننا اسطورة وحلم وزيف
ويقولوا الحب مالوش تسعيرة و مـ التخاريف
دول ناس ياحبيبتي يحبوا بسرعة وبالتخاطيف
لكن احنا جايين الدنيا نحب .. بشكل جديد
خبيني كده ..
دققت ف صورتي من الألبوم ولقيتني كبير
أكبر من سني لإن العمر مالوش تفسير
جيتي انتي تبصي عليها بعينك كنت أمير
مات حتي الحزن ف نن عيوني .. مفيش تجاعيد
خبيني كده ..
اتحايلي عليا شوية كمان اكتبلك شِعر
وانا خالي تماماً م الأدوات وموسيقي البحر
لكن فيه يوم راح اشوفك فيه خالي من المُر
هكتبلك فيه حاجه وهبعتها ف كل بريد
ويكون مطلعها بجملة تقول "خبيني كده.. "
