من دفتر رجل مهزوم
هشام صبح
عليكى ليا ولد
من صلبى
يكون شبهِك
ما ياخدشى
و لا شى منّى
سوى قَلبة شفّتى هازى
فى ساعة ما يقولو شامتين
خسرت خلاص
والاّ أقولك
حتى دى
كمان بلاش
خليه تمام يكون زيّك
لما تتبسّمى فى لحظة (كش)
و ميكونشى حزين زيى
مٌحترف خٌسران
أديكى بعد خمسين عام
لساكى زى أول يوم لقانا زمان
أمّا أنا
فرحت لمّا هزم الشيب سواد شعرى
وقلت وَقَار
لسّاكى لامّة القلوب حِلقان
لسّايا وحيد
و ايه يالايد
غير انى أبطل أبص فى مرايتى
أزيد و أعيد
و أرتب صور فى ألبومى
يوم كنت سعيد
لسّاكى بتحبى تشربى شاى؟
