إيــــــــه السعــــــــــــادة ....؟؟
أمير لبيب
ايه السعادة ؟؟
احساس مفاجئ بالحياة
احساس جديد بالعمر لسة فى اوله
او ان قلبك تملكه احلام طفولتك
عن أميرة بتبتسم فينور الكون بالحياة
بعدها .. ترجع لبيتها فى القمر
فيطير أميرها فوق وراها
بجناحات من السعادة و الامل
يعنى السعادة باختصار
انك تشوف معنى لحياتك
لون جديد
للأمان .. او للقلق
ليه الاندهاش ؟.. ايوة القلق
هى الاميرة السرمدية فى الحكاية
لو تضيع يوم من اميرها
او يلاقى نفسه يوم من غير جناح
من غير سعادة او أمل.. يقدر يعيش؟؟
لازم يموت....
عشان جناحه صبح ضعيف
او لأنه مالقاهوش
قلق الامير لتضيع حبيبته
قلق على عمره اللى جاى
ليكون سراب
او يكون الحلم طال
لكنه برضه يبقى حلم
بس فى الاخر كمان
يا أميرها المنتظر
قلق سعادة حضرتك
هو السعادة نفسها
هو جناحتك اللى طايرة بيك لفوق
علشان فى يوم
توصل لبيتها فى القمر
فتعيش ليالى حلمك المجنون
جوة الحقيقة
لسة بتسأل ايه السعادة ؟؟
بالبساطة تبقى حالتك
و الاميرة السرمدية فى الحكاية
واقفة بتنادى عليك
لسه عايز تعرف اكتر ؟؟
لحظة واحدة
قوم معايا
شوف كدة اقرب مرايا
بص فيها
شفت ايه !!
السعادة هى دى.....
هى ابتسامتك
