غرغرينة
عمرو شاهين
غرغرينة
(( من ديوان كأنك ملحمة))
من وقتها
بطل يحرق روحه بولاعة سخان .. علشان ما تكرفشّ
..
بهدوء
بتلملم طراطيف صوابعها فى سيجارة شوكولاته
وتمارس حزنها المتعاد
ف قلوب الناس
وتهرب
نظرة النشوة من عين جارة المترو
"يارب لو كانت بنتى شبهها
مش كان زمانها سعيدة "
نظرات اعجاب العساكر
اشبه بنظرة الريفى البسيط " للكريب "
وردها
يشبه كتير نظرة الخارج من عيادة ميدانية يوم 19/11
لبنت بتشترى فستان.
بهدوء
بتلملم طراطيف صوابعها
وبترمى اثار الجريمة ف وش بياع البطاطا
وتهرب .
...
من وقتها
اعترفِت ان دخان الحشيش بيقتل فى الضلوع طعم المغامرة
...
فى منتهى الوحدة
بيرش الناس توابل ع الجروح
ويبتسم
ألتهاب الجرح
مش ضرورى يبقى غرغرينة
ممكن يكون علامة للشفا
ممكن يكون البتر افضل طريقة للخروج م العجز
احيانا
كان بيتمنى جروحه تبقالها باب
كان بيتمنى يموت علشان يحس بحضنها
ما ربك؟
هو اللى يخلق زيها
ما دينك ؟
ايمانى مش بالمعجزة او بالنبى
ايمانى بالظرف المواتى
لاندفاع الغصن بين ورق الشجر
تنزل مشاعر عصفورين على كتفها
يلاقها حجة .. يقتل كسوفها بطبطبه و يرتاح .
يجوز علماء الهندسة غلطوا
أقصر طريق بين نقطتين
هو الوجع
