حلم .. قشاية
أمير لبيب
كان الشتا
بيعاند الاطفال اللى بتخرج تبتسم
فى العيد
و يداعب العشاق اللى بيمشو يضحكو
تحت المطر ..ـ
و بيحضنو دفا بعضهم
من جوة بعض
ـــــــــــــــــــ
و انا بترسم
من وسط كل العاشقين فوق السحاب
ع الارض
و بتحكى
من بين كلام المشتاقين
لحظات سكات
و فى ابتسامة كل عاشق
برتكب .. دمعات
و ف دمعة الموجوع فراق
بتولد .. ضحكة
مش باينة مرة
ولا باينة بطعم الشهد
ولا حتى تتشبه
بضحكة كهل فى الازمات
________________
لحظات سكاتى
فى وسط صمت العاشقين
مش زيهم
ولا حتى دمع الابتسام
ولا ابتسامات الدموع
.. الاختلاف
انسان غريق
مش زى ملايين البشر
اللى بتحلم بالامان
و حتى الحب و كفاية
مستنى حلمه
اللى هايجى ف وقت صح
يخلى لأزمته نهاية
رافض يكون غرقان حياة
فيبقى الحلم .. قشاية
