بنت قلبى
هشام صبح
كما الالوان الدايبة فى لفة التنورة على خصرِك
كما الايدين المولوية معلقة بين السما و الأرض
كما حُر فارسى باع عبودية الدنيا لجل حرية الفكرة
كما كل دول
فى قلب التوهة متعلق مع الاحلام
و حلمى;
كما الوِرد
بحضورك
يا سيدى محمد يا برهانى على القِسمة
يا سيدى محمد ياللى طليت
كما بزوغ الشمس على غيمة
و نورت الطريق ليا
يا سيدنا يا مجلى ضياء البدر للأعمى
أنا الحيران فى عز النور
بضَى الوَجد بتمايل
يمين و شمال
و يرتجف قلبى ساعة لقاها
و ضلوعى تشب حريق
أنا العاشق
انا المفتون
انا الفايت ورايا كوم لحم م الاحلام
من الحِنة اللى بتزين ضفاير العذراء
المايلة على كتفى
من البنت اللى نابتة بين ضلوع صدرى
و ضاربة بجدرها فى قلبى
كما عود من الصندل يفوح بعبير من الجنة
يا مزوقين شعور الصبايا لجل الفرح
زينوها
و زيدونى غرق فى بحر العين
و طفولى حريق الجسم
بحمرة خجل لما تملا خدينها
و شفايفها
يا سيدى يا مثبت فؤاد مين يريد سلوك دربك
جنيَّة فَتنتنى
و فاتتنى
لا انا عطشان
و لا مّروى
بطعم الخمر من ريقها
يا عمى ياللى بضاعتك عشق للرحمن
انا ولهان
و شوقى العذرى
صبح _عذرا_
أسير ليها
لكن عذرى
لسه العيون تشاهد فى طلتها
تجلى المولى على عَبده
يا مولانا يا مُجَلِّى القمر بالنور
يجوز أسكر بحضرتها؟
والا يكون وضوء الحِب من باب الادب واجب
للمستها؟
