حـسـاسـيـه
يحي قدري
جايز
عشان
كنت بتفضل ساكت
- وقت طويل -
افتكروك أخرس
ما يعرفوش
إنهم بعد أما بيمشوا
مابترميش سجايرهم
وبواقي التفل
وعنيك
بتعيد كل الحركات
وتدوّر
على آثار شفايفهم
في الكوبيات
وأنيابهم
في قلوب بعض ..
مش فاهمين
إن كل عضه جديده
في روحك
ليها لـذه مُفرحه
وكإن صاحبها
سايبلك ذكرى
تقدر بيها تحضر روحه
وتحييه جواك
وقت أما تعوز ..
شئ لا إرادي
بيخليك
تغمّي عنيك
وتآخد نفس
وتترمي في حضنهم
وانت عارف كويس
نفسَك قصير
وهما ريحتهم وحشه ..
فكان من الطبيعي
كل الحساسيه اللي في روحك
تطفح دلوقت
وتجبرك فعلا
ماتسلمش على حد .
