الطالع
فوق مدار الجدى
وقف مواليد برج الجوزاء
بيناقشوا أحقيه الطيور فى النوم ع الهوا
قال واحد :
ممكن يكون الاحتياج سبب طبيعى للخضوع
او تكون الطبيعة مبرر للوجع
قالت عجوز:
بعد السنابل يتحرق عضم الطلوع
لجل ما تدور الرحايا
قالت جميلة :
يمكن لو فتحنا عيونا ع الاخر
نشوف جوه بكادر جديد
الرموش مش عشان تحفظ عنينا م التراب
الرموش علشان تحافظ ع الحياة من وجعها
. قال اللى قاعد ع الطريق:
الوطن ملهوش وجود غير فى الخريطة
بروّز خريطتك ع الحيطان
واما تهجرها بصحيح
ارسم على ركن الوطن أول طريق أسفلت .
قال زعيم :
الصولجان من غير دراع .. مضرب ذباب
قال حكيم :
مضرب ذباب لو جه هدية م الحبيبة للحبيب هايكون إله
قالت الام قبل ما تفارق رضيعها:
الصولجان من غير تعب .. كما عود جريد على قبر مجهول النسب
قال الولد :
من غير وداع اللقاء ما بيبتديش
قالت فتاة :
من غير دموع النظر يضعف
و قال عذرائى فايت وقتها :
قص الجناح
اسلم وسيله للتخلص من ضياع الوقت
