أنا فيلسوف
هاني مهران
من غير كسوف ...
راح أحضنك !!!
وهطمنك ...
قبل أما تيجي تسأليني ...
إن اللي تم مش غلط
دا كان أدب !!!
وكان وصال بين القلوب !!
والعيب حقيقي ...
إنك تمانعي ... ترفضي
وتخالفي عمداً مذهبي
دا الحضن ده مش م العيوب
دا الحضن ده ...
حلقة رباط بين المشاعر !!
لو عارضتي بفكر خالف ...
منهجي
تبقي خسرتي وتتعبي
راح تبقي واقفة ...
ضد صعب من الظروف
ما أنا فيلسوف ...
أساليب فـ حبك هاكتشف
وها عترف...
إن عيونك ألهمتني ...
كل أفكاري الجديدة
والعقيدة السقراطية تتلغى !!!
وأكتب عقيدة بين ضلوعي
فكرها ...
عشق العيون المستحية ...
بالعواطف ترتجف
راح أنحرف ...
عن كل فكر الأشعري !!
وأعصر شفايفك جوا جوفي
رغم خوفي من ردودك
لما عودك ينطوي !!
أو ينكوي من جمر أشواق منهجي ...
أو تلجئ للأنسحاب وترددي
عبارات نسيجها من العتاب
وتكفني ...
أشواقي ليكي وتغضبي
لكن بفكري ها سجنك
وحيطان عواطفي
وأما تيجي تهربي
راح تهربي لحدود مشاعري !!
في الجنوب ...
ها تلاقي قلبي فـ كل دقة
عازف الألحان لعينك
في الشمال ...
ها تلاقي عقلي فـ كل لحظة
شاغل الفكر بحنينك
لو حاولتي تغَّربي
أو حتى ناوية تشرَقي
راح تغرقي ...
فـ بحور حنيني
وراح تجيني لو ببابك ...
شعب واقف بالصفوف
ما أنا فيلسوف ...
راح أكسبك
وهاغربك...
عن كل دنيا تشغلك...
عن دنيتي
ومعزتي ...
أساس بيرسم فكرتك
راح تبقي روحي سكتك
ونبضي يغزل هدمتك
بنسيج عروقي وتتكسى
راح تهمسي بكلام فـ حبي
عاجزه عن وصفه الحروف
ما أنا فيلسوف...
راح أرسمك فوق الملامح ...
بسمتي
راح يبقى طيفك ...
سكتي
وتبقي مجداف مركبي
وتأدفي ...
وتغوصي بيا ...
بين بحور عشق السنين
وتسيبي نفسك للغرام !!
مرساكي شط ...
من شطوط قلبي الأمين ...
على كل همسة تهمسيها ...
بالحروف من غير كلام !!
ويا سلام ...
لو تفتحي من شوقي ليكي ...
مدرسة
وتدرسي أساليب وعلم الفلسفة ...
بنظام جديد !!
من فكر روحي ومنهجي
وتعلميني
وتبقى إنتي فيلسوفة
وتيجي أنتي وتحضنيني
وأما آجي أسألك ؟!
ردك يكون ...
إن اللي تم مش غلط
دا كان أدب !!
وكان وصال بين القلوب
