عن واحد مسحراتى
أسامة سند
يا مسحراتى محيتش ليه ؟
من غير طبولك ما انتبهناش للآدان
من غير ما تخبط ع البيبان
مين اللى يفتح بين بطون الناس
وأذكار المساء
سموات وأرض بعرض رحمة ربنا
و ف كل واحد مننا
من ضلعنا الأشواق بتفضح بعضها
مين اللى شتت جمعها
إلا الغياب ؟
وأنا كنت بسأل عن دعاء مش مستجاب
والجنه ليه مش فاتحه أبواب اللقا ؟
رمضان بخيل
والصبح جاى دخيل
على الليل
اللى غاب من ندهتك
رمضان عليل
نغم السؤال المستحيل
بيرَّقص التنوره على حلم الإجابه
يبقى إيه معنى الصحابه المولودين
من غير نبى ؟
رمضان غيى
يا عيون طبيبى طبطى وما تطببيش
أنا والعيال حرمنا من أكل الياميش
من غير ما تجمع شملنا المزيكا
والفرحه اللى بنجيبها ببلاش
رمضان سجين
رمضان حزين
رمضان ما جاش !
