أصل الأنواع
محمد سمير مصباح
الناس ف الأرض غريبة بشكل
وبشكل غريب ع الارض الناس ..
بتعامل بعض وتتصرف
بيزاحموا بشِدة عشان الأكل
ويقطعوا بعض حتت ف اكياس
والنكرة ما بينهم يتعرف
دا بيخطف علشان يبقي كبير
ودا يفضح أسرار ناس ف البير
ودا يلعب ع الحبل ف مشاوير
وتمللي احوالهم بتقرَّف
دايرين ف التِرس يصارعوا ف بعض صراع دامي
تقريباً بيموت المسكين .. دا حفاظاً ع العرق السامي
زي اما تكون مشاهدهم أكشن ف درامي
تفاصيل أكتر .. علشان متقولش ببالغ مثلاً وبخرَّف ؛
(كان لُسطَيَ نجيب آخر ورقة ف شجر الطيبة
إيده بترعش ..
مع ذلك كان يفتح بدري ويبات ف الورشة لنص الليل
الدنيا ف عينُه رغيف عفِّن لازم يرميه
ولذلك عمره ما قال لأه لواحد ..دايرع الخلق يلم جنيه
يقفل ،ويشد بواقي الشارع من خطاويه
ويفضفض للعماويد هَمه اللي ف قلبه طاويه
والناس بتشوفه يقولوا :عاملهم ومكنّز..
ودا كنزه ف قلبه ودربه تمللي وجع و سكوت
يطلع ع البيت ..
والبيت واخد منه ملامح
من ساعة تعليق الصورة .. الباقية لهممن ريحة ابنه
اللي وعدهم يرجع م الحرب .
يسند ع الحيط وكراسي البيت وحاجات تانية
وكإنه بيطبع _ف الأشياء_ كل ملامحه
علشان ساعة ما يروح ويسيبها تحس فراقُه وتبكي عليه
دقق ف الصورة وكل صور عاشها ف لياليه
واتبسِّم للدنيا الفانية ..
اللي بتنقص زي العنقود
ومسك أوراق وقعد يكتب ف كلام باين كان دا أوانه
ودخل يتمدد ف سريره ..
*هامش :
كان ملك الموت عمّال يتشكل ف احبابه
علشان كده كان متبسِّم ..
وإيديه بتحاول تحضن شيئ مش للأحضان .
فات ليلة وليلة وبعض زباينه جُم الورشة
وفيه ناس ف الحارة تشوف وتقول :
يمكن قاعد ف مكان هادي وحَبّ يصيّف
ماهو برده البني آدم لازم يظبط فدماغه ويتكيف
لكن فيه ناس طلعت دوغري .. ع الشقة تخبط وترَزَّع
كسروا الابواب ولاقوه ف سريره ف شكل ملاك
فتحوا الشباك ..
علشان ريحة أصل الإنسان تطلع ويشوفها الخلق كتير
واحد منهم شاف الورقة اللي كتبها نجيب
وكدب علشان قال: عم نجيب .. وصالي بماله ومحتاله
خطفوها الناس .. عرفم كدبه
عرفوا ان نجيب وصي لحارته .."من عند شفيق ابن محاسن
لاحمد محمود وسناء عبده
بالمال والورشة وأشياءُه "
بصوا لبعضيهم واتضايقوا
واتفقوا علي ان مايتفقوش
فده بدأ الخطف بترابيزة
ودا شال النجف المتدلي
ودا يضرب ده وداهو بيحوش
فضلم ع الحال دا لحد ما فضّوا البيت كله
ولا حد دفن جثة صاحبه ولا راعوا وجود الموت ف البيت .. )
القصة دي واحد حكهالي ..
مرضيتش يكمّل أحداثها وقعدت أتوّه ف كلامي
وقعدت أقول ليا ف نفسي :
"الناس ع الأرض غريبة بشكل
وبشكل غريب فوق المحدود
الناس علي بعض بتتلون
ان شالله علي الطفل المولود
والله عندك حق يا دارون
شكلنا فعلاً من أصل قرود "
