سرّاح ما بين خطوتك
محمد الحمامي
سرّاح ما بين خطوتك
والخطوة مخطوفة...لحنِي نغَم ضحكتك...
والسِنة مصفوفة
رُصي الخُطي رُصي..والله هتحسِي..
إنك في عيني ورود...فيها الرحيق معقود...وأدي الجناح مفرود...علي وردة مقطوفة
سرِيح علي شطك...بياع كلام عاشقين
والضي لو لطِك...بيغمُر الشطين...
يا حُمرة الخدين...يا خلق يوم حِسوا
الشعر مش نَوّاح...
ضلعي وَتَد وسلاح...يا ضمة الأرواح
قلبي الهوي مسُوا
سألوا إللي كان قبلي...
عايشها ليه موجوع...تكسِي الكلام بدموع
الشعر لو مَوضُوع...حاسب اوي في رَصُه
يا سليلة الأنساب
قلبي صُفح وكتاب...هتفرِي هتفِري
يا أم القوام ملفُوف
الغَد لو مكشوب...أرجوكي ما تقرِي
بأن الفؤاد مشطوف...من كثرة التعاريج...
وإن الروح مشتاقة...لراحة التفريج
يا صبري بين صبرين...أنا من زمان صابر
لو كنا يوم ولفين...فـ بلاها نتكابر...سيبي الهوا عابر..
علي سطري يتقابل
يمكن ف يوم أتلاقي ...
مرهون علي صدرك
يمكن أكون مخنوق...مستني إني أفوق
علي شمة من عِطرك
