علاء عيسي
صبرك يا أيوب لسَّة
لسَّة الجراب ياما فيه
جاية البلاوى كتير
نفسك
قصيِّر ليه؟
ولسّة بدرى عليك
لمَّا تقول :
فاض بى
لسَّة حبابى عنيك
صدِّقنى
يا صاحبى
طول مالحبابى فيك
لساها جوة عنيك
ماتقولشى ع الدنيا
دى ماشية بالمقلوب
فهمت يا أيوب
لو يسألوك ع السكن
وقالوا :
واقع ليه؟
ماتقولشى عيب فى المون
وافهم باقولك إيه.
الصح هوة الغلط
والعيبة مش فى الزلط
فهمت يا أيوب
لو يسألوك ع السكن
العيبة ع اللى سكن
هوة اللى زق الطوب
فهمت يا أيوب
