كوبونات
تادرس صلاح
الساعة فى ايدك..
واقفة من امبارح..
و العقرب سيدك.. حابساه الستة.. "ماتروحش فى حتة"
توهانك توِهه.. كل اللى بيقرا..
اِستنى يا بقرة..
لو عاوز حاجة..
و بطلت تعوزها..
هاتجيلك بكرة..
و هاتطلب غيرها..
لو فاكر.. اِنسىَ..
اللى انت فاكرهم..
مواعيدك.. سيبها..
قبل اما تسيبك..
خليك الفاعل..
فى جملك و جملهم..
خليك محورهم..
و الناس هاتجيلك..
خليك لو مرة..
بطلك و بطلهم..
ده الفيلم بتاعك..
وزع ادوارهم..
الناس هاتلومك..
اِن سيبت مكانك..
الفيلم بدونك..
ينقصه نُقصانك..
احلامك لسة..
بتنام , تحلمهم..
بدلك , قمصانك..
عاوزاك تلبسهم..
ماجات الشاى..
دول مين يشربهم..!!
اصحابك قالوا..
ان انت صاحبهم..
خليك المكسب.. فى اكياس الشيبسى..
و غطيان البيبسى..
خليك الكرسى و جادون العجلة..
دى الناس اطفال..
عشمانة تفوز..
و نُصنا كوبونات..
مافيناش محظوظ..
بنخربش بعض..
يا بيطلع بُعد..
يا بتطلع صورتك..
ضاربالك بوز..
