حلمي إختارك تكوني حبيبته
هاني آدم
حلمي إختارك تكوني حبيبته
و تقاسميه أيامه الجايه
نص محبه و نص شقاوه
و نص حلم و نص أسيه
حلمي إختارك و إتمناك
و ف عز العتمه إستناك
مركب شمس و نور و حياه
كل ما تضحكي بأنسي اﻵه
قلبي تعب من كتر الوحده
و إختار يتعبد ف عنيك
كان بيدور وسط الزحمه
و ما صدق جواه يلاقيك
حلمي ما كانش مجرد فكره
و لا وهم بيتمني عبير
نور و هدايه و مليون آيه
خير اللهم إجعله خير
قادر ع النصر ف كوابيسك
شايفك مهره و قلبي عريسك
لا هو مستني قدر يبعدنا
ولا دمعه تغازل كراريسك
سمرا بلون أحلامي الضايعه
قلبها شع حنين و أماني
ضحكتها المكسوفه بتقدر
تشعل حبي و تطفي نيراني
