سمّر ( ثنائيه قديمه )
عمرو شاهين
من ديوان الانثى وحاجات شبهّا ( فى التجميع )
سمّر
1
سمرا
زى لون المحرومين م الضل
أو زى ضل
بـــــ يخلقه شجر القصور
يتجمعوا تحته الغلابة
نظره عينيها الثاقبة
مصل الحقيقة
تكشف خبايا العاشقين للنور
شعرها
يشبه خيوط ليل البراءة
أو
براءة الليلة الأخيرة
ف الوجود
أنثى بــــ تسعى للخلود
أو يجوز
إن الخلود
كان نفسه يتجسد في أنثى
فـــ اصطفاها
...............
2
اسمر
زى لون الطمي معجون بــــ الشقا
أو زى دخان القنابل في الخليل
نظره عينيه الغارقنين في هموم كتير
أمر انسحاب
من براثن معركة ويا النسا
خطوته
محتاجه تتعرف على شكل الطريق
أو يجوز إن الطريق
هو اللي محتاج يعرفه
أحلامه .. طاقه محرِكه
مع انه في وضع الثبات
صوره للعبد المطيع
أو يجوز
ان الخجل
كان نفسه كائن يعبده
وجهّ سهامه
واصطفاه
