مجلس بلدنا اتحرق
هاني مهران
مجلس بلدنا اتحرق
أنا قلت: ايه يعني؟
قالولي: ايه يا جدع
هوَّ انت مش مصري؟!
مفروض عليك تِزْعَل
وتْشِيل كمان الهَمْ
أنا قلت: مش فارقة
طول عمرنا في الغَمْ
وكمان ما هيش ناقصة
أزِيد همومي هَمْ
قالولي: مش مكسوف
نبقَى ف قلق وظروف
وتقول ما هيش فارقة؟!
ما تخلِّي عندك دم
وتقُوم وتتحرك
أنا قلت: هعمل ايه ؟!
مطافي بتْطَّفِي
بترُوحْ ما بتطَفِيش
قوات وبتساعد
ومساعدة ما تكَفِيش
وشعب قام يِدْعِي
طول عمره ما يصلِّيش
وجهود بتتَّابِع
من خلف دَرْفِةْ شِيشْ
أنا قلت: هعمل ايه؟
لا أنا عضو مجلس شعب
ولا حتى قائد جيش
فرَفَعْت إيدِى لْفُوق
يا رب خلصَّنا
يا رب خلصَّنا!
فِهْمُونِى برده غلط
سَحَبُونى للتفْتِيش!
