شايف بوضوح..نُص الصورة
أحمد أسامة
شايف بوضوح..نُص الصورة
والنُص طشاش
شايفك ببلاش وانت الغالي
وجَي فـ بالي..
أحضن وابكي
أسمع واحكي
وأشتم واشكي
ملعون شكّي..
وملعونة عينيك
وانا بدعي عليك..
ابقى ادعيلي
وارميلي أمارة فـ وسط كلام..
إنك فاكر..
وإنك عامل حق وخاطر..
للي ما كانش فـ حلمك شاطر
مهما يذاكر قلبك فـ عينيك
وأنا بدعي عليك..
هفضل كارِه..
وافضل مشتاق
وانا بدعي عليك هذُكر أسماء
واذكُر أشياء..
واذكُر أجواء شاهده علينا
هكتب أبيات باينة حزينة
بس بتضحك..
لو جات على سيرة فيها عينيك
وانا بدعي عليك
خلّيك عارف..
إن انا شايف نُص الصورة
والنُص طشاش
مابقاش من حقّي أشوف بعدك
ولا اعيش بعدك
طول ما انا مكتوبلي..
اموت فـ عينيك
ملعون شكّي..وملعونة عنيك!
