بيني وبينك
نادية مدني
مالك بقى؟ زعلانة ليه؟
قولي لي مالك
اضحكي
كتر اﻷسى غيّب جمالك
اضحكي
ما باحبش التكشيرة في اليوم الجميل
باطلب كتير؟
طب قولي مالك؟!
ما انتاش واخد بالك أنا غضبانة ليه؟
معقولة سر الدمعة دي
ما وصلش ليك؟
ﻻزم أنا اقول لك عليه؟
طب شوف بقى
بقالي مدة بانتظر منّك حنان
بقالي مدة نفسي يجمعنا مكان
نقعد سوا
نحكي سوا
نضحك سوا
نبكي سوا
حاجات كتير نفسي احكيها لك
قصص كتير وهموم كتير نفسي اشكيها لك
والوقت ضيق
والخُلق ضيق
تفتكر ممكن نوفق
بين هوايا وبين مزاجك؟
تفتكر ممكن نعالج
توهة الحال اللي مالية عشرتي وياك؟
تفتكر ممكن هواك
يروي عطش أرضي
اللي بقالها كتير بتستناك؟
يقدر هواك؟؟
أنا على فكرة مش باعتب عليك
أنا فاهمة
بس في قلبي حتة
لسه برضه محتاجة إليك
خليك معايا
تعرفي؟
الدنيا دي صَبحت غريبة
الدنيا دي من غُلبنا صارت عجيبة
والهمّ طال
والراحة صارت م المحال
أحمال كتير
تعرفي يومي الجميل بيبقى إمتى؟
لو نزلت الصبح ما قابلتش خناقة
لو قدرت أعدي يوم
من غير جدال متعب
مع كائن غبي
أو حتى من غير ما اشتبك مع جار سخيف
إحساس مخيف
لما يبقى سلام نهار
بيني وبين الدنيا دي
هاجس ضعيف
والله يا حبيبتي
بقت أيامي حرب ما تنتهيش
بقى الشقا ع الرزق حالة
والمتاعب كل يوم فوق القوالة
ما تزعليش
تعرفي؟
حاجة واحدة مصبراني عالشقا
حاجة واحدة مخلية اﻷيام تفوت
حاجة واحدة
إنك انتي واقفة جنبي
حاجة واحدة
مخلياني لسه عايش
قد إيه زادِك مهون قسوة الدنيا
تعرفي؟
أكيد ما تعرفيش
طب أقولك؟
إنسي كل اللي حصل
واضحكي
مش عشان "حقك عليا وما تزعليش"
لكن عشان الدنيا تحلا في عيني تاني
اضحكي..
تعرفي؟
أنا... باحبك
