لما تشرب قهوة برة
أحمد سلامة
لما تشرب قهوة برة
انت دون الكل عارف
طعم اي قهوة مُرة
ليه بتطلب وانت خايف ؟!
علّي صوتك لما تنده
شد ع الحرف ف كلامك
الصبي ؛
ما اسموش حمادة
لما تطلبها زياده
عيب حقيقي ف كل مرة
بردو بينزلها سادة
أصلُه مش ذنب الصنايعي
صوتك المدبوح مهاودة
ولّا كان ذنب المعلم
مالصبي .. مقتول مناهدة..
انت طالب
وانت حابب
انت عاشق
وانت غاوي ..
هو ذنبك بس وحدك
إنت نازل وانت ناوي..
ليه بتشرب قهوة برة ؟؟
وانت سييد كل القهاوي
