روبابيكيا
نادية مدني
روبابيكيا وكراكيب
أدراج على دواليب
وحاجات واكتشافات
حكايات ليها بواقي
والنهايات؟.. ما تلاقي
والتدوير ما بيخلص
وتودّي وتجيب
روبابيكيا.. كراكيب
دوشة ومالية الراس
وقصص في الكراس
جوابات.. اعترافات
ومشاكل.. وهوايل
والماضي والآتي
واﻷسرار في البير
متشالة لحبيب
معقولة دي روبابيكيا؟
معقولة دي كراكيب؟
هيصة ومالهاش آخر
وأدينا بنتسامر
لو ينفع.. لو يشفع
تبعد.. أو تتّاخر
والماضي بتباريحه
يتدارَى ويغيب
ونبيع اللي تاعبنا
روبابيكيا.. وكراكيب
