ماليش فيها
عمرو شاهين
وجاى بتلومنى ع الايام
وع العمر اللى سافر بينا للمجهول
وع المحنه اللى قتلت قلبى ميت مره
انا كافر بكل طبيعى او مألوف
ف لا بعشق سواد الليل
ولا عاشق لنور الشمس
لما تطل ع الدينا
انا كاره شجر اخضر
خضار بهتان
انا
ولا اى كلمه حب تأسرنى
وتقسمنى على العاشقين
متين مره
عشقت البنت هياها
متين مره
ضربنى العشق بالشلوت
كأن العشق كان معمول لناس غيرى
وهيا بتعشق اللى يقول ( واحشتينى )
ف سامحنى
يا نص نهار بيتعكز على بدر السما الباهت
منيش عصفور برىء اصفر
هايفرح لما تنعشله ديدان الارض
ولا خفاش ها يتأذّى بنور شمسك
انا لون الشفق
حاير
ماليش مطرح
ماليش موقف
ماليش فيها
ولو نامت ف يوم شمسك
بلاش تندهلى اصحيها
