عاجبني بجد إحساسك
هيثم نور
دي كلمة حق قلتيها .... قصدتيني انا بيها
وقولتيلي بلاش أحسن .... لا تعرف تنتحر أحسن
وأنا نفسي تكون أحسن.... ضلالك عنها .. صدقني
عليك أحسن
___________________________
وعاندتك وكابرت وكعادتي .... طلبت إني أعرف
___________________________
عرفتك قبل لما أعرف .... سباني السحر لم أعرف
تبعتك كيف أنا المندوه .... في غربه عرفت فيها أتوه
ولم أعرف
__________________________
وشالتني معاكي بلاد .... وحطتني معاكي بلاد
وفاكر يومها لما اتقاد .... حريقك .. كنت أنا المتقاد
وفاكرني ساعتها أصغر ومستكتر .... تكوني ليا مش اكتر
وفاكرني ساعتها هناك .... فـ نفس الحته دي اللي هناك
بقولك لسه بدرينا .... علينا .. نبتدي بينا
سيبيني أشق فيه لينا .... طريق يمكن يعدينا
ويومها وعدت أرجعلك .... أشيلك .. مهنتي بعلك
وكان ردك وبسمعلك .... كلام فارغ ما ينفعلك
مسكتي الكف من يدي .... وقولتيلي سوا نعدي
عجبني الرد من خبتي
___________________________
وخطيت الطريق مكفوف .... ومن ريش الجناح منتوف
فتحتيلي البلاد غازي .... حصون تصعب على النازي
ولبستيني تاج عرشك .... على دماغي وأنا المهزوم
ومش ذنبك
___________________________
عرفتك كيف ندى على الورد .... فراشه بتحتمي مـ البرد
لقيت فيكي اللي ناقصني .... حنان كحلت بيه جفني
وكففني
وضميتك وضميتي وخبيتك وخبيتي .... وعدى صحاب على بيتي
لقوني خرجت لم أرجع
___________________________
وفاق الوحش قام يزأر .... وقال حلمي أنا أكبر
لقاه في الكهف كان نايم .... حماره لسه أهه نايم
وعدى الوقت مش أكتر
___________________________
وقال يلحق .. وإيه يلحق .. ومين يلحق .. دا طول الوقت
كان نايم
في حضن أميرة الأحلام
___________________________
أنا فاكر قالولي اصحى .... ومش فاكرني يوم بصحى
أنا فاكر فـ لحظه بفوق .... بقولك إوعي لازم أفوق
واقوم واجري ورا الأحلام .... بعزم ما فيا بجري أوام
ومهما جريت أنا لقدام .... بلاقي الخطوه ريحالك ورجعالك
ومهما طريقي كان سالك .... بلاقيكي في وسطه السد
ولاقيني بضيع أسرع .... في حضنك لا ما فيش أمتع
أموت فيكي واكون هالك
____________________________
وافوق تاني واموت تاني .... في دايره فيها أنا فاني
لحد ما جيتي بإرادتك .... وشاورتي على وقتك
وقولتيلي ما تنفعنيش .... أنا نفسي في مره اعيش
معاك حلمي حلف ما يجيش .... معاك نفسي ادوق اكتر
وما فهمتش ما ترجمتش .... كلامك سم بيقطر
معايا حلمك إتبخر!!
ونفسك تلحقيه لوحدك .... وشايفه البعد مصلحتك
___________________________
عاجبني فيكي إحساسك .... بإني جرحت إحساسك
وأنا المتشال على راسك .... وأنا اللي بالهوا ماسك
وأنا الخاين وأنا البايع .... وأنا اللي بقيت خلاص صايع
لعبتي فـ وقتك الضايع .... بضربه فاسك المايع
قطعتي حبل ياما إتمد
__________________________
وجايه تقولي كلمه حق .... وقصداني أنا بيها
وبتقولي بلاش أحسن .... لا تدبحني الحروف فيها
وقال نفسك اكون أحسن .... ضلالي عن حقيقتي قال
عليا أحسن
_________________________
وعاتبتك
حمار أصلي ما بتعلمش .... ضحكتي وقلتي ما تهزرش
يا دوبك لسه متأثر .... دا لسه عندي ليك اكتر
وخايفه عليك لا تتكسر
_________________________
تعالى اقولك اللي كان .... حكايتك زوبعه فـ فنجان
أنا ياما عليها صبرت .... وقلت نصيب ما انا اللي إخترت
لكني في النهايه زهقت .... وبحمد ربي إني لحقت
أدوق قهوه في غير فنجان
_________________________
دي كلمة حق قلتيها .... قصدتيني انا بيها
وقولتيلي بلاش أحسن .... لا تعرف تنتحر أحسن
وأنا نفسي تكون أحسن.... ضلالك عنها صدقني
عليك أحسن
_________________________
غريب يا زمان
يعايرني إللي أنا صنته بخوفي عليه
يعايرني وناسي إني كدبت عليه
وقلت معايا مش فارق .... يكون كامل يكون فارق
يكون مجروح يكون غارق
يكون كداب يكون صادق
_________________________
أنا خنتك صحيح لما .... كدبت عليكي وحضنتك
وبوست عنيكي من جوه
وقلت الجرح مش فارق
_________________________
أنا فاكر ساعتها انا مت
كدبت وقلت أنا عايش
وعشت أكدب علينا الجوز
لعبت الدور وصدقتي
وضاربه البوز
ومن يومها وانا مهزوز
ومن نفسي وانا منبوذ
خاطرها بطيبه بخبتي
لحد ما صدقت خبتي
وجايه تقولي كلمه حق
_________________________
عاجبني بجد أحساسك .... باني جرحت إحساسك
وأنا المتشال على راسك .... وأنا اللي بالهوا ماسك
_________________________
غريب يا زمان
